ســـــــلام

شعر : محسن أبو كريشة

خلوا السلاح صاحي ماعدتشي تنفع خلاص

حمام سلام وصاحي غنوا وهيصوا يا ناس

حمام وسلام في أوسـلو والعدو سلم عليه

أدي الصهاينة وصلوا وإحنا عملنا إيه؟؟؟؟؟

جامعة دول عربية؟!! كلام وفعل ما فيش

أوهام سلام دولية وعدو ما يختشيش

كلام كتير وهيصه وتصريحات رنانة

أمم متحدة كوسه وذمم كتير خربانة

فيه ناس كتير غلابة بتنام من غير عشا

ويا ما ناس ديابة لا لـوم ولا خشا

وإحنا برضه أمم متحـدة ومبسوطين

حرس الديب الغنم حكمونا الصهيونين

إصحوا يا قوم وفوقوا دي حرب مش سلام

مدوا اللسان ودوقوا السم في الحمام

عدوك أصله خاين من كان صبي

كداب وكدبة باين شوف قتله كام نبي

وفي ما أمنوا زور طلب يشوفوا الإله

بقت ديارهم بور والكل راح وتاه

هاصبر وإصبر معايا وإدعي وقول يا رب

يخلص زمان الآآآآآي ويفك هو الكرب

ونشوف اللي ظلم في يوم موقف عظيم

يداري في الحجر هو وكل لئيـم

وهاقوم وأشيل سلاحي من غير مايجيني نوم

خلوا السلاح صاحي إصحوا فوقوا يا قوم

إصحوا وفوقوا يا قوووووووووووووووم